BAGUIO CITY – Pimmusay ti maysa a lider ti New People’s Army (NPA) ken ti maysa a kadwana iti napasamak nga engkwentro iti nagbaetanda ken ti tropa ti gobyerno sadiay Gueday, Besao, Mountain Province idi parbangon.
Maibasar iti report, manarimaan ti joint combat operations ti Bravo Company ti 69th Infantry Battalion, Philippine Army, kadwada dagiti pulis tapnu kumpirmaren ti report seknan iti presensia dagiti rebelde nga agkik-kikil ken agbirbiruk ti taraon iti nasao a lugar.
Nupay kasta, sadiay a nakarinnupak dagiti soldado ti grupo ti Kilusang Larangang Guerilla Abra-Mountain Province-Ilocos Sur (KLG-AMPIS) ti NPA nga idadauluan ti ni Marcos Kina-ud Yocogan alias Corel/Timmy.
Kalpasan ti engkwentro a pimmaut ti sumagmamano a minutos ket narekober ti dua a bangkay.
Nabigbig dagitoy a da Marcos Yocogan a residente ti Bangaan, Sagada, Mountain Province ken ti kadwana a nabigbig laeng iti alyas a “Simon”.
Nakumpiskar pay iti nakapasamakan ti engkwentro ti dua a rifle; dua a bandolier a naglaon ti siyam a magazine nga addaan met ti karga a bala, dua a two-way radio, maysa nga improvised explosive device (IED), maysa a flashlight, medical supplies, maysa a sako ti bagas, personal a sanikua dagiti rebelde ken dagiti subersibo a dokumento.
Naisalog metten iti sentro ti ili dagiti bangkay dagiti napapatay a rebelde.
Maipalagip nga idi September 28 ti agdama a tawen ket naaddaan metlaeng ti engkwentro dagiti soldado ken ti KLG-AMPIS ti NPA sadiay Bontoc, Mountain Province a nakatayan ti dua a rebelde ken nakakumpiskaran ti nagduduma nga armas.
Sigun met iti militar, gapu iti report nga agtataud kadagiti maseknan nga umili ket nalaka a maiwanwanawan ti militar ti presensia dagiti kalaban ti gobyerno.
Kinunada pay a dakkel ti epekto iti NPA ti panakapapatay ti maysa kadagiti lider dagitoy nangruna ta adda iti militar ti sibubukel a suporta ti komunidad a nauman iti kinaranggas dagiti rebelde.
Pinagyamanan pay ti miliitar ti komunidad ti Besao, Mountain Povince gapu iti panangipapaay dagitoy ti impormasyon iti lokasyon dagiti rebelde nga NPA.
Inkarida metlaeng ti nairtengan latta a kampanya ti militar kontra iti KLG-AMPIS ti NPA sadiay Mountain Province agingga a sumuko wenno matnag iti linteg ti kaudian a miembro ti grupo.
Nupay kasta, agtaltalinaed ti apela ti tropa ti gobyerno iti panagsuko dagiti nabatbati a rebelde nangruna ta nakasagana met dagitoy a tumulong iti panagsubli dagitoy iti sidong ti gobyerno.
