Pinirmaanen ni President Ferdinand Marcos Jr. ti Ligtas Pinoy Centers Act ken ti Student Loan Payment Moratorium During Disasters and Emergencies Act ita laeng nga aldaw.
Babaen iti Ligtas Pinoy Centers Act ket maaramid dagiti permanente nga evacuation centers a saan a madadael uray dumalapos ti bagyo nga addaan iti imet nga agingga iti 300 kilometers per hour ken seismic activity a dumanon iti magnitude 8.0.
Iti panagbitla ni President Marcos Jr. bayat ti seremonya a naangay idiay Malacañang ita nga aldaw, kinunana a masapol a masigurado a naan-anay dagiti pagbakwitan dagiti Pilipino a maapektaran kadagiti kalamidad ken daduma pay nga emerhensiya.
Impettengna a masapol ti ag-invest kadagiti climate-resilient facilities saan laeng tapno masalakniban dagiti umili nu di ket tapno maksayan dagiti risgu nga itunda dagiti didigra.
Dinutukan ti chief executive ti Department of Pubic Works and Highways a mangsigurado iti timely construction ken kalidad dagiti maibangon a pasdek.
Kabayatanna, babaen iti Student Loan Payment Moratorium During Disasters and Emergencies Act ket mabalin a maipaayan dagiti estudyante kadagiti calamity-declared areas iti financial relief.
