BAGUIO CITY- Nasken nga awan ti maited nga academic requirements wenno aniaman nga aktibidad dagiti estudyante iti kanito a mangipatungpal dagiti pagadalan ti academic break kasaruno ti panang-aprobar ti lokal a gobyerno ti Baguio iti panakaipatungpal ti nasao a bakasyon.
Nagbalin a kiddaw daytoy ti Commision on Higher Education (CHED) – Cordillera kalpasan nga addan dagiti pagadalan iti lokalidad a nangipatungpal ti academic break.
Iti panakiuman ti Bombo Radyo Baguio kenni CHED-Cordillera Regional Director Demetrio Anduyan Jr., kinunana a liman a pagadalan iti Baguio ken Benguet ti nangituding iti academic break dagitoy ita a bulan.
Sigun kenkuana, dagitoy ket ti Saint Louis University, University of Baguio, University of the Philippines-Baguio, Pines City Colleges ken Benguet State University.
Innayonna met nga agdependar latta kadagiti pagadalan ti aldaw ken kabayag ti academic break dagitoy nangruna ta saan nga agpapada ti school calendar dagitoy.
Linawlawaganna pay nga awan ti academic break iti academic calendar dagiti pagadalan isut gapuna a nasken nga ag-adjust dagitoy tapnu saan a maapektaran dagiti naisagana nga academic activities dagitoy.
Inyunay-unay pay ni Director Anduyan a ti academic break ket para iti panaginana dagiti estudyante ken mannursuro manipud iti stress ken depression.
