Pimmusay ti lima nga indibidual bayat a duapulo ti nadangran, ken dua ti mapukpukaw gapu iti nakaro a kondision ti sasaaden ti panawen nga intunda ti Intertropical Convergence Zone (ITCZ) ken Shear Line, kas maibasar iti report ti National Disaster Risk Reduction and Management Council (NDRRMC) idi kalman.
Sigun iti NDRRMC bulletin, dagiti pimmusay ket nairekord iti Regions II, IV-A, IV-B, V, VIII, ken XI.
Iti pakabuklan, 436,164 nga indibidual wenno 139,000 a pamilia ti naapektaran gapu ti nasao a kondision ti pannawen.
Iti nasao a bilag, 549 a pamilia, wenno 2,366 nga indibidual, ti agdama nga agsapsapul iti pagkamangan iti 29 nga evacuation centers.
Ti saan a nasayaat a kasasaad ti paniempo ti rason ti dakkel a pannakadadael ti imprastruktura, maysa ti naipadamag a pannakasinga ti koriente, 39 a kalsada, ken innem a rangtay ti saan a malasatan kadagiti naapektaran a lugar.
Mapatta-patta a dumanon iti agarup P215 milion ti gatad ti nadadael, bayat a 698 a balbalay ti partially damaged ken 394 ti naan-anay a nadadael.
Dumanon metten iti P15.15 milion ti naiwaras a tulong.
