BAGUIO CITY – Naan-anayen a linteg ti Republic Act No. 11604 a mangimanmandato iti panangisayangkat ti Department of Public Works and Highways (DPWH) iti full rehabilitation and maintenance ti Kennon Road nga addaan kaatiddog a 33.534 kilometers manipud Rosario, La Union agingga iti Baguio City.
Daytoy ket kalpasan a pinirmaan ni Presidente Rodrigo Duterte ti nasao a linteg para iti panakapasayaat ti maysa kadagiti kangrunaan a kalsada pastrek iti Baguio City ken iti Benguet.
Nailanad iti linteg a ti DPWH ti responsable iti panakamintinir ti Kennon Road ken iti panakaipasigurado nga agtalinaed a natalged daytoy ken mabalin a pagnaan dagiti motorista.
Makikoordinar ti DPWH iti DENR-Cordillera para iti evaluation ken assessment ti agdama a kondisyon ti Kennon Road tapnu mabigbig dagiti kasapulan a trabaho a maaramid para iti rehabilitasyon ti nasao a kalsada.
Isayangkat pay ti DPWH ti maysa a feasibility study tapnu maplano ti kabayag ken kalawa ti rehabilitasyon ti Kennon Road tapnu mapagbalin nga “all weather” road.
Manarimaan metlaeng iti tinawen a General Appropriations Act ti kasapulan a pondo para iti rehabilitasyon ken panakamintinir ti Kennon Road.
Maipalagip a nabayag a nairikep ti Kennon Road kadagiti motorista gapu iti serye ti panagreggaay a napasamak sadiay a nangitunda iti panakadadael dagiti paset ti kalsada ken rangtay sadiay.
