Impaima ti Cybercrime Investigation and Coordinating Center (CICC) iti Philippine National Police-Anti-Cybercrime Group (PNP-ACG) ti listaan dagiti social media influencers para iti posible a case build-up gapu iti panangitandudoda iti illegal online gambling.
Sigun kenni CICC chief Undersecretary Renato “Aboy” Paraiso, dumanon iti 30 nga influencers ti mangitantandudo paylaeng iti illegal online gambling.
Inayon daytoy a naobserbaranda dagiti top 15 influencers a mangipabpablaak iti promotions ti illegal online gambling websites no sadino, addaan dagitoy ti agarup 1.1 million agingga 9.2 million a followers iti social media.
Impetteng ni Paraiso a kiddawenda a maikkat ti sites dagiti social media influencers ken i-endorsoda iti PNP-ACG para iti umno a pannakaipila ti kaso kontra kadagitoy.
