BAGUIO CITY- Nasarakan ti bangkay ti maysa a loan officer a naibelleng iti maysa a rangkis sadiay Barangay Bayao, Pinukpuk, Kalinga idi rabii.
Nabigbig daytoy a ni Denver Fernandez, 25-anyos, tubo ti Quirino Province, loan officer ti microfinance company nga ASA Philippines Foundation sadiay Junction, Pinukpuk, Kalinga.
Iti imbestigasyon ti Pinukpuk PNP, nagturong ti biktima sadiay Barangay Bayao tapnu agkolektar ti bayad dagiti loan ngem saanen daytoy a nagsubli.
Kalpasanna ket nasarakan laengen ti maysa a residente ti bagi ti biktima ken ti motorsiklo daytoy, agarup 30 a metro manipud iti nasao a bangkay bayat a mapukpukaw ti backpack daytoy a naglaon ti resibo, passbooks, napapateg a dokumento ken ti kwarta ti biktima.
Sigun iti pulisya, nagsagrap ti biktima iti adu a tagbat iti dua nga imana, tallo a sugat iti ngato ti kanawan a lapayagna, maysa a nauneg a sugat iti karabukobna ken bagsol iti kanawan a siket daytoy.
Nasarakan met ti agarup P25,000 a cash a nabalkot ti lupot a nailemmeng iti underwear ti biktima a mapapati a koleksion daytoy.
Iti agdama ket agtultuloy ti imbestigasyon iti nasao a kaso.
