BAGUIO CITY – Kiniddaw ti lokal a gobierno ti Sto. Niño Barangay ditoy siudad ti Baguio ti panakaipasidong ti barangayda iti localized lockdown.
Sigun kenni Punong Barangay Camilo Tacbas Jr., daytoy ket gaputa pagparparikutan ita ti barangayda ti pondo para iti panakagatang dagiti kasapulan a relief ken foodpacks para kadagiti residente dagitoy.
Kinunana a gapu iti panakai-lockdown ti entero a barangay ket marigatan dagiti umili nga agbirok iti pagtaudan ti pagbiyagan dagitoy.
Nagsurat ti kapitan kenni Baguio City Mayor Benjamin Magalong tapno agbalin a localized ti implementasyon ti lockdown iti barangayda.
Sigun kenkuana, tarigagayda a dagiti laeng partikular a purok a nakailistaan iti kaso ti COVID-19 ti maipasidong iti lockdown.
Maipalagip a naipasidong ti Sto. Niño Barangay iti lockdown manipud pay idi Agosto 5 kalpasan a nagpositibo ti 35-anyos a babae ken empleyado ti City Hall a residente ti nasao a barangay.
Mangnamnama pay ni Kapitan Tacbas Jr. a patgan ti lokal a gobieno ti siudad ti kiddawda a localized lockdown.
