Nagballaag ti lokal a gobierno iti siudad ti Baguio a maibabawi ti lisensia dagiti matiliw a mangipatpataray iti iligal a motorcycle-for-hire wenno “angkas” iti siudad.
Sigun kenni Mayor Benjamin Magalong, napeggad ti panagaramat iti motorsiklo kas pampasahero a lugan ken awan metlaeng ti prangkisana a nairuar para iti daytoy manipod iti Department of Transportation-Cordillera.
Impetteng pay ni Mayor Magalong nga awan ti umdas a training, insurance, ken salaknib para kadagiti pasahero dagiti nasao a motorcycle transport service.
Gapu iti daytoy, imbilin ni Mayor Magalong iti Baguio City Police Office a paengtan ti operasion kontra iti iligal nga “angkas” iti siudad.
Sigun met kenni BCPO director Col. Ruel Tagel, manarimaan ti panangisayangkat iti pulisia kadagiti operasion tapno malapdan ti panagadu iti saan nga otorisado a motorcycle taxis.
