Nagpirma ti lokal a gobyerno ti Benguet iti Memorandum of Agreement (MOA) kadua ti Department of Education- Schools Division Office ti Benguet (DepEd SDO-Benguet) ken BRYCE Consulting Services, Inc. para iti pannakaiyemplementar iti Mental Health Capacity-Building Program para kadagiti sumagmamano a mannursuro iti probinsya.
Impetteng ni Governor Melchor Diclas a pakabuklan a bilang a 245 public teachers iti probinsya ti naituding a dumalan iti training kas Mental Health First Responder-Coaches a panggepna a mangbukel iti natbtibker nga school-based support system para kadagiti estudyante iti probinsya.
Sigun iti pablaak ti gobernador, dumalan dagiti permanent teachers iti training inton sumaruno a bulan iti sidung ti nasao programa a pundoan ti Provincial Government no sadino agsanayda babaen iti THOUGHT Mental Health First Responder-Coach Certification Program, maysa a programa iti sidung ti AnchorED 1M Movement.
Sigun kenni Governor Diclas, nailatang ti P2 milyon para iti nasao a programa kaggidan iti panangiyunay-unayna iti kinapateg ti mental health support kadagiti estudyante.
Innayon daytoy makatulong ti nasao a programa iti panangbukel iti serbisyo a makatulong iti panangsigurado ti aglawlaw a pakariknaan dagiti estudyante a masupsuportaranda.
Naimatangan ti presensya ni Assistant Schools Division Superintendent Nover Keithly S. Mente kas nangibagi iti DepEd SDO-Benguet, Annie Caguioa, AnchorED 1M Mission Partner, ken Lead–CAR a nangibagi iti BRYCE Consulting Services, Inc.
