Naobserbaran ti City Health Services Office-Sanitation Divisionti panagbaba ti groundwater levels manipud Enero sigun iti inpatungpalda a monitoring sigun ti impablaak ti Baguio City PIO.
Gapu iti dayta, nagpalagip manen ti lokal a gobyerno ti Baguio City kadagiti residente ken turista seknan iti panagsalimetmet iti danum kagidan iti panagtultuloy ti panagbaba ti groundwater levels.
Daytoy ket epekto ti mapaspasaran nga El Niño iti pagilian.
Binmayag metlang ti pannakarecharge ti groundwater level gapu ta limitado laeng ti panagtudo na kadagitoy napalpalabas a bulan.
Malaksid iti dayta, adda pay dagiti report ti panagngato ti turbidity iti groundwater nangnangruna iti operasyon iti rabii.
Sigun pay iti pablaak ti Information Office ti siudad, kinumpirmar ti Baguio Water District bayat iti meeting ti Technical Working Group ti siudad seknan iti El Niño a ti panagbaba ti groundwater levels ket makaapapektaren iti water supply ti sumagmamano a lugar.
Inlawlawag ti Baguio Water District a saan nga umdas ti tudo tapno ma refill dagiti aquifers. Bayat a pangatuen daytoy ti danum kadagiti surface reservoirs, kasapulan ti dua a bulan a diretso a panagtudo tapno mafully recharge dagiti aquifers.
Kaaduan gamin a water source ti siudad, nakadepende kadagiti groundwater wenno aquifers.
Gapu iti daytoy, kidkiddawen ti lokal a gobyerno ti siudad a suportaranda ti conservation efforts babaen iti panagsalimetmet ti danum, panangitarimaan a dagus kadagiti leaks ken panagrecycle kadagiti danum no kasapulan. //bombokaren.c.s
