Inlawlawag ni Benguet Vice Governor Ericson “Tagel” Felipe iti Bombo Radyo Baguio no kasano a nagballigi daytoy iti negosasyon iti agtagikua iti lote a nakaaramidan ti temporaryo a kalsada iti ngatuen ti nargaay a paset ti Pilando section ti Halsema Highway sadiay Pilando, Bakun, Benguet.
Sigun kenni Vice Governor Felipe, kinatungtongna ti lot owner nga abanganna laeng iti makatawen ti nasao lote tapno dagus a maaramid ti temporaryo a kalsada a pagnaan dagiti apektado a motorista ken biaheros.
Innayonna nga inaramidna daytoy agsipud ta saan nga immanamong ti lot owner iti diaya ti Department of Public Works and Highways a gatangen ti nasao nga ahensia ti lote iti P100 per square meter.
Sigun kenni Vice Gov. Tagel, agtaud iti bukodna a pondo ti pangbayadna iti lot owner kas temporaryo a solusyon bayat nga maur-uray ti panakatarimaan ti nargaay a paset ti kalsada.
Kinunana pay nga daytoy ket kas tulongan iti pagsapulan ti pamilya ti lot owner agsipud ta nalawa ti nasakup ti naaramid a kalsada.
Kagiddan iti daytoy, kiniddaw ni Tagel iti publiko a saanda nga agaapa iti social media no asino dagiti rumbeng a mapadayawan.
Kinunana nga iti biangna ket saanna a tarigagayan nga mapadayawan gapu ta sipupuso ti panagtulongna kadagiti umili.
Sigun pay kenkuana, ti rumbeng a mapadayawan ket ti Dios a mangipapaay iti bendision iti tunggal maysa, ken obligasyonna met nga ipaay iti publiko ti maaw-awat daytoy a bendisyon.//Bombo Mera Pacpacan
