Kinomendaran ti Land Transportation Franchising and Regulatory Board (LTFRB) ti maysa a taxi driver manipud Iloilo City gapu iti panangisublina iti bag a naglaon iti P2.4 million a nabati ti pasaherona.
Nabigbig ti taxi a driver a ni Anthony Barredo Aguirre, residente ti Amparo, Pavia, Iloilo.
Maibasar iti report, nakaawiden ni Aguirre idi nakaawat daytoy ti awag manipud iti operatorna a mangdamdamag nu adda ti nabati ti pasahero a bag iti taxina.
Dagus a sinukimat ni Aguirre ti uneg ti taxi ket ditoy a nakitana ti bag a nakakabil iti sirok ti tugaw.
Imbes nga idulinna ti kwarta ket inturongna iti istasyon ti pulisya ken impanamnamana a maisubli iti akinbagi.
Kagiddan ti panangdayaw ni LTFRB Chairperson Guadiz iti nasao a taxi driver ket ginuyogoyna met dagiti dadduma a drivers ti utility vehicle nga aramidenda met ti inaramid ni Aguirre.
“Honesty like this deserves recognition. We hope Mr. Aguirre’s story serves as a reminder of the importance of doing what is right, even when no one is watching,” Guadiz said.
