Naidungpar ti maysa a hiace commuter van iti poste ti kuryente iti Longlong Road partikular sadiay Little Kibungan, Puguis, La Trinidad, Benguet itay laeng parbangon, September 1, 2025.
Iti inisyal nga imbestigasyon ti Traffic Enforcement Unit-La Trinidad, pasang-at ti nasao a lugan idi kellaat a nagturong daytoy iti bangir a linya a nangitunda iti panakaidungparna iti concreto a poste ti kuryente.
Gapu iti napigsa nga impact ti nasao a lugan ken ti napartak a panagpataray ti driver, na-cracked ken naburak ti baba a paset ti poste ti kuryente a nangitunda iti panakatumba daytoy ken panakapukaw ti suplay ti kuryente sadiay.
Nabigbig ti driver ken ti pasaheros daytoy nga agtawenda iti 19 ken agpapada nga estudyante.
Iti panakiuman ti Bombo Radyo kenni PCpat. Mark Organo Botangen-Traffic Officer ti Traffic Enforcement Unit-La Trinidad, naduktalan a nakainum iti nasangir nga arak ti driver kalpasan a rinumwar ti resulta ti breathanalyzer daytoy.
Sigun met kadagiti residente, nakangeg dagitoy ti “skid” ti lugan sakbay a nakangegda ti uni ti naibangga sakbay a naawan ti suplay ti kuryente dagitoy.
Kabayatanna, kinuna ti Director ti Benguet Electric Cooperative nga agarup dua nga oras a nakarekep ti kalsada gapu paylaeng iti napasamak nga insidente.
Iti baet dayta, naisubli metlaeng ti suplay ti kuryente kadagiti babalay a naapektaran iti nasapamak nga insidente.
Innayonna pay a naituding a maangay ti tungtungan kadagiti pamilya dagiti karaman iti insidente no anya ti possible a tulugan para iti panakatarimaan ti nadadael a poste.
Nasayaat met ti kasasaad dagiti nasao a pasaheros ken ti driver daytoy.//Bombo Noveh Organo
