BAGUIO CITY – Nasurok iti kagudua a milyon a pisos ti gatad ti lugan ti gobyerno nga inuram dagiti saan pay a nabigbig a suspek sadiay Abatan-Bagnen provincial road partikular iti Sitio Gipik, Bagnen Proper, Bauko, Mountain Province itay laeng nabiit.
Segun iti Bauko PNP, ti nasao a lugan ket maysa a pick-up a tagikua ti Provincial Environment and Natural Resources Office ti Mt. Province nga addaan iti plaka nga SDB 810.
Kinuna met ti Bureau of Fire-Bauko a nakaangotda iti gasolina manipud iti nauram a lugan.
Sakbay ti insidente ket inaramat ti CENRO-Sabangan ken PENRO-Bontoc ti nasao a lugan iti panangipatungpalda iti anti-illegal logging activities iti watershed ti Bila ken Bauko, partikular sadiay Mt. Ambodaaw ken Mt. Dandanak.
Nakita laengen ti maysa a concerned citizen a maur-uram ti nasao a lugan isut gapuna nga impakaammona daytoy kadagiti otoridad.
Iti agdama ket imimbestigaran ti pulisya nu asino ti suspek iti nasao nga insidente.