BAGUIO CITY – Maklasipikar kas ‘critical zone’ iti COVID-19 ken maipasidong iti localized lockdown ti Silao Street sadiay Purok 2, Bulanao, Tabuk City, Kalinga kalpasan a naduktalan a dagiti nagpositibo sadiay iti nasao a sakit ket konektado iti maysa a religious organization sadiay.
Daytoy ket kalpasan nga inaprobaran ti City Inter-agency Task Force on COVID-19 nga idadauluan ni Tabuk City Mayor Darwin Estrañero ti mosyon para kadagiti nasao nga addang.
Immuna iti daytoy, nailista ti pito a kaso ti COVID-19 a konektado iti nasao a religious organization sadiay Bulanao Norte a pakairamanan ti lima a pastor, maysa a 55-anyos a babai ken maysa a 7-anyos a lalaki a bin-ig ita a naka-quarantine iti Tabuk City Isolation Unit ken iti Kalinga Provincial Hospital.
Dagus a maipatungpal ti localized lockdown apaman nga aprobaran ti Regional Inter-agency Task Force ti nasao nga addang.
Maitunos met ti panakabigbig ti Silao Street kas ‘critical zone’ iti Zoning Containment Strategy ti National Task Force Against COVID-19.
Iti sidong ti istratehiya ket maklasipikar a ‘containment zone’ dagiti amin nga adda iti masakupan ti 500 a metro manipud iti Silao Street bayat a maklasipikar a ‘buffer zone’ ti kanayonan a 500 a metro manipud iti containment zone.
Maipawil to ti mass gatherings iti uneg ti ‘critical zone’ ken malimitaran ti garaw dagiti tattao malaksid pay iti nainget nga implementasyon dagiti minimum health standards.
