Im-imbestigaran ita iti Department of Social Welfare and Development ti maatap a kaso iti panagabuso kadagiti ubbing iti maysa a balay-ampunan idiay Pampanga.
Sigun kenni Social Welfare and Development Secretary Rex Gatchalian, addan iti rumrumwar a nagan dagiti responsable iti daytoy ngem kitkitaenda pay dagiti daduma a suspek a pilaanda iti kaskenan a kaso.
Iti agdama, nakikoordinar metten ti nasao nga ahensya iti Bureau of Immigration tapno malapdan ti posible a panaglibas ti suspek a maysa a ganganaet.
Maibasar iti datos a nairuar,dumanon iti nasurok 160 nga ubbing ti naarayat manipod iti New Life Baptist Church of Mexico, Pampanga Inc. gapu iti maatap a panakapasar dagitoy iti pisikal, verbal, ken psychological a panagabuso.
Sigun kenni Gatchalian, dakdakkel a bilang dagiti ubbing ti mangibagbaga a saan a pudno ti akusasyon bayat a lima agingga walo kadagitoy ti mangibagbaga nga adda mapaspasamak a panagabuso.
Nupay kasta, dagiti ubbing ket adda itan iti kustodiya iti DSWD bayat a naipaiyulog metten ti cease and desist order para iti nasao a pasilidad.
