Binilin ti Department of Transportation (DOTr) ti Land Transportation Office (LTO) nga imbestigaranda a dagus ti maatap a kaso ti payola iti nasao nga ahensia.
Maipalagip a ti payola ket sekreto a panangipaay iti kuarta, kasukat ti pabor, nasaysayaat a pannakatrato, ken dadduma pay.
Impaulog ni Acting Transportation Secretary Giovanni Lopez ti nasao a direktiba kas sungbat iti mapampanggep a tallo nga aldaw a nationwide transport strike ti grupo a Manibela intun Disiembre 9 agingga 11 iti agdama a tawen.
Sigun kenni Lopez, imbilinna kenni LTO Chief, Assistant Secretary Markus V. Lacanilao a solusionanda ti isyu ken mangisubmitirda iti rekomendasion seknan iti daytoy.
Kabayatanna, imbilin metlaeng ti nasao nga opisial nga ipangpangruna ti LTO dagiti empleadoda nga addaan iti kapada nga alegasion tapno maikkatda a dagus iti puesto iti kanito nga adda ti umdas nga ebidensia.
