BAGUIO CITY – Natiliw ti maysa a maatap a marijuana courier ken nakumpiskar kenkuana ti P7.8-M a gatad dagiti marijuana bricks iti checkpoint/interdiction operation nga insayangkat dagiti otoridad sadiay Purok 3, Barangay Bado Dangwa, Tabuk City, Kalinga idi kanikadua.
Nabigbig daytoy a ni Michael Macad Assudo, 35-anyos, baro, mannalon ken residente ti Loccong, Tinglayan, Kalinga.
Maibasar iti report ti Kalinga Police Provincial Office, nakaawatda iti impormasyon seknan iti panangibiahe ni Assudo iti maatap a marijuana manipud sadiay Loccong, Tinglayan babaen iti nangisit a motorsiklo.
Nailanad pay iti impormasyon a naikabil iti carton ti maysa a nalatak a courier company.
Kabayatan ti operasyon ket pinara dagiti otoridad ti nasao a motorsiklo ken iti panangsukimatda iti imetna a carton ket sadiay a naduktalan ti 65 a pidaso ti marijuana bricks nga addaan kadagsen a 65 kilos.
Sumangsango metten ni Assudo iti kaso a panaglabsing iti Comprehensive Dangerous Drugs Act of 2002.
Gapu iti daytoy, kinuna ni PCol. Davy Vicente Limmong, dadaulo ti pulisya sadiay Kalinga a nasken a mairtengan dagiti intelligence operations ken checkpoint operations gaputa maysa daytoy a sungbat iti panakalapped ti iligal a panangibiahe kadagiti marijuana sadiay.
Kinunana nga adun ti wagas dagiti sindikato ti iligal a droga tapnu laeng maibiahe dagiti kontrabando iti baet dagiti lockdown gapu iti agdama a pandemya.
Iyap-apelana pay kadagiti umili iti agtultuloy a panagridamda ken iti dagus a panangireportda kadagiti otoridad iti aniaman nga operasyon wenno aktibidad mainaig iti iligal a droga iti lugar dagitoy.
