BAGUIO-Nagpalawag ni Police Major Marlou Evasco, hepe ti BCPO Station 7 seknan iti panakasitar iti maysa a babai kabayatan ti panag-inom daytoy iti danum iti sangwanan ti maysa a bakery sadiay Public Market idi kalman.
Iti interview ti Bombo Radyo Baguio kenkuana, kinunana a kanayun iti panangibilinda kadagiti amin a sumsumrek iti public market wenno Central Business District a masapol a dagitoy a nanganen wenno nagmeryenda wenno agturongda kadagiti kaasitgan a panganan wenno restaurant.
Innayonna a kas maibasar iti city ordinance no.45 series of 2020 nasken nga aramaten dagiti facemask iti umno a wagas, suruten ti social distancing ken daduma pay.
Iti met panangilawlawagna iti nasao a nasitar nga indibidual iti public market, kinunana a nagduduma ti trato dagiti kapulisan nu sadinu nu nagaramid ka iti saan nga umno ket masitar ka a masitar.
Impaganetget ni Police Major Evasco a nu awan ti naaramid a saan a napintas wenno awan iti nilabsing iti asinuman ket mabalinda nga ilaban daytoy ken saanda nga agmulta.
Dinakamatna a nu sika ti umno ket nasken nga agpalawagka tapno mailaban ti karbengan nu talaga a saanda a nilabsing ti aniyaman nga ordinansa ditoy siudad.
Malaksid iti daytoy, iti kanito a mapaneknekan nga awan ti nilabsing iti nasao nga indibidual ket saan kuma a nagbayad ti multa.
Gapu iti daytoy, kinuna ni Evasco nga iti panagbayad ti nasao a babai iti multa ket inakseptarna nga adda ti nilabsing daytoy.
Inlawlawagna a kadagiti daduma ket agdiskarte dagitoy a saanda nga ipamarang nga agin-inom wenno mangmangan nu adda dagiti kapulisan nga agwanwanawan tapno saan a masitar.
Inyunay-unay daytoy nga awan ti mang-mangan kadagiti kalsada ken sidewalk wenno iti publiko a lugar.
Nagbalakad met daytoy kadagiti daduma a kapulisan a nu adda iti maysa nga indibidual nga agkasapulan la unay kas iti panag-inom ket posible nga ikonsidera dagitoy wenno ti makunkuna a “Humanitarian Consideration”.
