Kinuwestionaran ni Senate Finance Committee Chairperson JV Ejercito ti maatap a pannakaiyakar ti agarup P206 Billion iti version ti House of Representatives iti singasing a P7.2-trillion national budget para iti 2027.
Sigun kenni Ejercito, adda ti dakkel a panagbalbaliw iti naisingasing a pondo, pakairamanan ti pannakakissay ti P130 billion para kadagiti foreign-assisted projects, P9.5 billion para iti calamity fund, P4.4 billion para iti Health Facilities Enhancement Program, ken P4 billion para iti immunization program.
Nakissayan metlaeng ti P40.4 billion a pondo para iti transport sector, pakairamanan ti P19.7 billion para iti Metro Manila Subway Project ken P15 billion para iti North-South Commuter Railway.
Kabayatanna, nanayunan iti P10 billion ti pondo ti Department of Agriculture para iti tulong kadagiti mannalon ken mangngalap, idinto a P23.9 billion ti nainayon iti Medical Assistance Program ti Department of Health.
Sigun kenni Ejercito, kasapulan a malawlawagan dagiti rason ti panagbalbaliw ti alokasion, ken nasken a masigurado a mapan ti pondo kadagiti talaga nga agkasapulan.//mp4
