BAGUIO CITY – Mababbabalaw ti maatap a pwersado a panangserrek dagiti pulis iti general headquarter ti Benguet Electric Cooperative (BENECO) sadiay South Drive, Baguio City iti parbangon idi kalman.
Iti panakiuman ti Bombo Radyo Baguio kenni Engr. Melchor Licoben, kinunana a naidanon kenkuana a maatap nga adda ti inala dagiti pulis a dokumento manipud iti opisina.
Dinakamatna nga indauluan ni Atty. Omar Mayo ti nasao a panagserrek iti pasdek.
Maipalagip a ni Atty. Mayo ti dinutukan ti National Electrification Administration (NEA) kas caretaker wenno Project Supervisor ti BENECO.
Innayonna a naklaatda pay iti saan a panangipalubos dagiti pulis manipud iti Police Regional Office Cordillera (PROCOR) iti iseserrek iti compound dagiti sumagmamano nga empleyado ti kooperatiba.
Kinukwestionaranda metlaeng ti kaado dagiti armado a pulis a nagbantay iti masakupan ti compound.
Sigun kenni Engr. Licoben, makium-umandan kadagiti abogadoda para iti kaskenan nga aksion.
Impettengna nga adda ti karbenganda a mangipaay ti aksion nangruna ta ado dagiti empleyado a saan a nakastrek iti trabahoda.
Patienna a saan a nainkalintegan ti pwersado a panagturong dagiti pulis ken ti kampo ni Atty. Ana Maria Banaag sadiay BENECO nangruna ta inaramidda daytoy iti parbangon.
Nagturong met ti mayor ti Baguio general headquarter ti BENECO ken kinasaritana da Atty. Mayo ken ken Atty. Banaag ngem saan a naipakammo ti napagsaritaan dagitoy.
Kabayatanna, impetteng ti PROCOR a nabilin laeng dagitoy nga agbantay iti general headquarters ti BENECO tapno mangimando iti linak ken kappia iti masakupan ti kooperatiba.
Kabayatanna, nangipaulog ni Atty. Mayo iti memorandum idi kalman, October 18 a mangibilbilin iti panagsubli iti trabaho dagiti sumagmamano nga empleyado ti BENECO.
Madawdawat pay ti pormal a surat dagitoy a nakailanadan ti pammalawagda no pay a saanda a rumbeng a madusa iti saanda a panagreport iti trabahoda idi kalman.
Naipaayan dagiti maseknan nga empleyado iti tallo nga aldaw a pawayway para iti makalkalikagum a pammalawag.
Inlanad ni Atty. Mayo iti pammilinna a maap-apektaran ti operasion ti kooperatiba iti saan a panagtrabaho dagiti nasao nga empleyado.
Maipalagip a saan a simrek ti sumagmamano nga emleyado ti BENECO kalpasan ti maatap a panangbarikada dagiti pulis iti entrance ti compound ti kooperatiba.
Sigun met kadagiti dadduma, simbolo daytoy ti panagtubngarda iti panangdutok ti NEA kenni Atty. Ana Maria Rafael Banaag kas General Manager ti BENECO ken iti panangsuportarda kenni Engr. Melchor Licoben a dinutukan met ti Board of Directors (BOD) ti BENECO kas General Manager ti kooperatiba.
Naiyunay-unay pay iti memorandum a nasken a saan a makasinga iti aniaman a transaksion ti maipatpatungpal nga assembly iti masakupan ti BENECO.
Nailanad a mabalin a makitabuno dagiti empleyado iti nasao a panagtaripnong ngem saan a rumbeng nga iti oras ti panagtrabaho.
Nasken met a maala ti permit para iti assembly manipud iti lokal a gobyerno ken masurot dagiti health protocols nga itudtuding ti linteg.
Naimuntar ti nasao a memorandum iti main entrance ti BENECO.
Innayon pay ni Atty. Mayo a saan a pawpawilan ti “management” dagiti empleyado malaksid laeng dagiti sinuspendir ti NEA.
Iti interview ti Bombo Radyo Baguio, linawlawagan ni Atty. Mayo ti gagarana iti panagturongna iti general headquarters ti BENECO idi parbangon kalman.
Inaklonna a nagturong daytoy iti kooperatiba kadwana dagiti deputized a pulis manipud PROCOR kas maitunos iti pammilin ti NEA.
Inlawlawagna a daytoy ket tapno ipatungpaldan ti preventive suspension kontra kenni Engr. Licoben ken kadagiti pito a BOD ti BENECO.
Impettengna nga adda ti baro a resolusyon nga impaulog ti NEA a mangibilbilin iti panangbantay ti pulisya iti masakupan ti BENECO tapno saanen a makastrek dagiti nasao nga opisyal ti BENECO iti uneg ti tallo a bulan.
Impalagip ni Atty. Mayo nga idi paylaeng September 28 a naiserbi ti preventive suspension order kontra kenni Engr. Licoben ken kadagiti pito a BOD ken naipaayanda pay ti 20 nga aldaw a mangisumiter ti Temporary Restraining Order (TRO) ngem saanda nga inkankano daytoy.
Kinunana nga adda ti naawatna a communication letter manipud iti bangko seknan iti uppat a dishonor cheque a pinirmaan da Engr. Licoben ken BOD President Atty. Esteban Somngi a napetsaan idi September 30 a mampampaneknek a naawat dagiti dua nga opisyal ti suspension order ngem saanda a nagtulnog.
Gapu iti daytoy, impatungpaldan ti preventive suspension idi kalman.
Impetteng ni Atty. Mayo nga amin a function ti maysa a general manager ken board president nga inakkem dagiti nasao nga opisyal manipud idi Setymebre 28 ket saan a balido.
Imbutaktak pay ti project supervisor nga adda ti impaluspos ti BENECO a P20-M manipud iti maysa a bangko idi October 5 iti baet a nasuspendir ni Engr. Licoben ken dagiti pito a BOD.
Kinuwestionaran ni Atty. Mayo no apay a nakairuar dagiti nasao nga opisyales ti BENECO ti minilmilyon a pisos iti baet a nasuspendiren dagitoy idi pay September 28.
Patienna a daytoy ti maysa a rason no apay a nasken a lapdan ti NEA dagiti aniaman a saan a nasayaat nga aksion tapno masalwadan ti pondo ti kooperatiba.
Nupay maibagbaga a private industry ti BENECO, inlawlawag ni Atty. Mayo nga adda ti koneksion wenno partisipasyon ti gobyerno gaputa dagitoy ti nangipaay ti prangkisa ken otorisasyon ti kooperatiba para iti operasyon daytoy.
Dinakamatna a mangipapaay ti gobyerno ti subsidiya iti BENECO para iti sitio electrification program tapno maiwayat ken maidanon ti suplay ti kuryente kadagiti nasulsulinek a lugar.
Innayonna a mangipapaay metlaeng ti gobyerno ti pondo para iti Barangay Line Enhancement Program isut gapuna a nasken a dumalan pay iti NEA ti pondo para iti evaluation sakbay a maipaima iti BENECO.
