BAGUIO CITY – Maas-asikaso dagiti 19 a nursing students ken maysa a Clinical Instructor (CI) ti University of Baguio (UB) a naka-quarantine ita sadiay Bauko, Mountain Province kalpasan a nagpositibo dagitoy iti COVID-19.
https://www.facebook.com/bomboradyobaguio/videos/451543683170471
Pammatalged daytoy ni Dr. Janice Kaylyn Lonogan, Vice President for Academic Affairs ti UB kasaruno ti panakaidanun iti Bombo Radyo ti pakaseknan dagiti nagannak ken guardians a saan a panangasikaso ti unibersidad kadagiti nasao nga estudyante.
Iti panakiuman ti Bombo Radyo Baguio, inlawlawag ni Dr. Lonogan a 146 a nursing students a nagudwa iti 12 a grupo nga addaan ti saggaysa a CI ti nagturong iti Luis Hora Memorial Regional Hospital sadiay Bauko, Mountain Province para iti on-the-job training dagitoy iti first semester ti school year 2021-2022.
Kinunana a sadiayen Luis Hora a naipasidong iti swab dagiti nasao nga estudyante ken instructors idi Lunes, January 3 kas maibasar iti polisiya ti pagagasan nupay iti sigud a katulaganda iti UB ket iti Baguio ti swab testing.
Rimwar met iti resulta idi Martes a 17 a nursing students ken maysa a CI ti positibo iti COVID-19 sakbay a nagpositibo ti dua pay a nursing students idi kalman.
Impettengna a na-isolate dagiti nasao nga estudyante iti boarding houses a nagdagusan dagitoy ken dagus a nagresponde ti UB ken ti Luis Hora babaen iti panaka-assess dagiti estudyante ken dagiti CI.
Naamuan nga awan ti sintomas dagitoy idi Martes ngem dua kadagitoy ti nakitaan ti sintomas idi kalman nga ita ket na-admit iti pagagasan.
Dinakamat pay ni Dr. Lonogan a kaaduan kadagiti estudyanteda a nagturong sadiay Bauko ket nagtaud kadagiti probinsia kas iti Pangasinan, Nueva Vizcaya, Baguio City ken La Trinidad, Benguet.
Impettengna nga adda dagiti mangas-asikaso kadagiti pagkasapulan dagiti estudyanteda ken Clinical Instructors dagitoy a naka-quarantine ita sadiay Bauko.
Kinunana a babaen daytoy iti partnership ti unibersidad ken dagiti maseknan a boarding houses ken adda pay dagiti kapamilya dagiti mannursuro ti unibersidad.
Dinakamatna nga idi agsapa ket nangipatuloddan ti COVID-19 kits ken taraon para kadagiti nasao nga estudyante.
Nangisayangkatda pay ti online conference idi kalman ken sadiay a naamuanda kadagiti Clinical Instructors a ti kangrunaan a pakaseknan dagiti estudyante ket ti taraon ken accommodation dagitoy nga immunan nga inaksionan ti unibersidad.
Inyunay-unay ni Dr. Lonogan a nainget ti panangmonitor ti UB iti sitwasyon dagiti nasao nga estudyante ken Clinical Instructors dagitoy malaksid a saanda a kinayat ti napasamak.
Kabayatanna, manarimaan met ti panangala ti Bombo Radyo iti benneg dagiti maseknan nga estudyante, LGU ken ospital.
