Dumanon iti agarup 52.9 a gramo ti maatap a shabu nga adaan ti SDP a PhP359,720.00 ti nakumpiska manipud ti pagtaengan ni a.k.a “Ambi” , agtawen iti 44, maysa a driver ken maibilbilang kas High Value babaen iti impatungpal ti Regional Police Drug Enforcement Unit (RPDEU) a Search Warrant sadiay Purok 4, Ambiong, Baguio City ita nga aldaw.
Dagitoy ket naala manipud iti maysa a pouch ken ti kadakkelan a volume ti maatap a shabu a nakumpiska ket naala manipud iti vault a kinasapulan a dadaelen dagiti operatiba gapu ta awan ti susi na.
Ti search warrant ket naiyulog idi July 21, 2026 manipud iti Executive Judge, Regional Trial Court, Branch 6 First Judicial Region, Baguio City.
Malaksid ti dayta, nakumpiska metlaeng ti lima nga improvised glass tooter, nausar a foil, dua a pouch ken lighter.
Sumango met ti suspek iti kaso a panaglabsing ti Section 11 ken 12 iti RA 9165 wenno Comprehensive Dangerous Drugs Act of 2002.
Balligi ti pannakaimplementar ti search warrant babaen ti Regional Police Drug Enforcement Unit iti Police Regional Office Cordillera Administrative Region (RPDEU PROCAR) nga isu ti lead unit; Regional Intelligence Division, Station 6-Baguio City Police Office, City Intelligence Unit-BCPO, City Drug Enforcement Unit Baguio, PDEG Special Operations Unit Codillera Administrative Region ken Regional Intelligence Unit-14.
Ti suspek ken dagiti nakumpiska nga ebidensya ket adaan iti kustodiya ti RPDEU PROCAR.
Kabayatanna, iti impormasyon a nakalap ti Bombo Newsteam, daytoy metten ti maikatlo a gundaway a natiliw ti suspek gapu iti kapada a kaso. // via Bombo Noveh Organo
