BAGUIO CITY–Nainget a kinondenar ni Mayor Mauricio Domogan ti maatap a panagbaybay-a ti kontraktor ti patrabaho sadiay Sandico St., Salud Mitra, Baguio City a nagresulta iti pannakatay ti dua a tattao kalpasan a nagaburan dagitoy iti nagreggaay a daga itay kanikadua.
Sigun iti mayor, rumbeng laeng a maipilaan iti kaskenan a kaso ti kontraktor ti patrabaho.
Kinunana a nasken koma a dimmalan iti nainget nga inspeksion ti lugar ti patrabaho tapno naipanamnama a natalged daytoy kadagiti mangmangged ken trabahador.
Patien ti mayor a nakaaramid iti “gross negligence” ti kontraktor ti patrabaho a nagresulta iti nasao a trahedia.
Maipalagip a pimmusay da Engr. Patrick Lachica, 23-anyos, project engineer, residente ti Beckel, La Trinidad, Benguet ken ni Hanah Jean Aragon, 22-anyos, HR representative ken residente ti Happy Homes, Baguio City kalpasan dagitoy a nagaburan iti daga.
