BAGUIO CITY – Inreklamo ti maysa a taxi driver ti panang-ala ti operator ti imanmanehona a taxi iti rebate wenno diskwento a maipapaay kadagitoy tunggal agpakrudoda kadagiti gasoline stations.
Sigun iti nasao a taxi driver, manipud 2016 ket kaaduan a taxi operators iti lokalidad ti nangiyakar iti pagkruduan ti taxi driver dagitoy ken dagitoy a mismo ti mangkolkolektar iti diskwento nga it-ited dagiti gasolinaan.
Kinunana a dagiti taxi operators ti agpili no sadino ti rumbeng a pagpakruduan ti driver dagitoy ken alaenda dagiti resibo tapnu dagitoy a mismo ti apan mang-claim iti rebates a dumandanon iti P4 tunggal litro.
Imbingayna nga iti taxi operator a pagserserbianna ket addaan iti 30 a taxi units ken agbaybayadda iti P100 iti nasao nga operator no mapukawda ti resibo.
Dinakamatna a mapagungtan pay dagiti taxi drivers no umakar dagitoy iti dadduma a pagkruduan malaksid iti intuding ti operator dagitoy.
Impettengna pay a dagiti taxi operators ti agnumnumar iti panagngato ti plete ita gaputa impangatoda met ti boundary dagitoy ken iti kompanya a pagserserbianna ket P500 ti ngimmatuan ti boundary a baybayadanna.
Innayon ti maseknan a taxi driver a bassit latta ti take-home pay a maal-ala dagitoy gapu iti agdama a sitwasyon dagitoy.
