Natiliw iti siudad ti Baguio ti mabigbigbig a “notorius drug personality” idi kalman, Abril 25, 2026, babaen iti naipatungpal a search warrant.
Ti operasion ket naipatungpal idiay Barangay Alfonso Tabora, Baguio City babaen iti Philippine Drug Enforcement Agency CAR- Baguio/Benguet Porvincial Office (Lead Unit) kaduada ti Abra Povincial Office, PDEA- CAR Regional Special Enforcement Team Alpha ken dagiti kapulisan.
Ti suspek ket agtawen iti 48, awanan trabaho a lalaki ken residente iti nasao a barangay.
Rumrummuar pay a daytoy ket addaan iti napalabas a rekord seknan iti iligal a droga nu sadinno nakemmeg idi Agosto 2021.
Bayat ti nasao nga operasion, nakumpiskar ti walo a pidaso iti heat sealed transparent plastic sachet a naglaon iti maatap a shabu nga agdagsen iti mapatta-patta a 14 grams ken addaan iti Standard Drug Price a P95,200.
Malaksid iti dayta, nakumpiskar pay kenkuana ti sumagmamano a drug paraphernalia manipud ti pagtaengan daytoy.
Ti suspek ket sumangsango iti kaso a panaglabsing iti Section 11 ken 12, Article II iti Republic Act 9165 wenno ti Comprehensive Dangerous Drugs Act of 2002.
Kabayatanna, sigun kenni Martin Francia, Regional Director iti PDEA Cordillera, ti nasao nga operasion ket adda paylaeng ti pakainaiganna iti monitoringda kadagiti 54 drug-cleared barangays iti siudad nu sadinno sumagmamano a drug personalities ti agtultuloy nga agop-operate.
Maguygoyugoy met ti publiko ti panangireportda nu adda man dagitoy iti impormasion seknan kadagiti indibidual nga agar-aramat iti iligal a droga. | via Bombo Noveh Organo
