BAGUIO CITY – Impetteng ti presidente ti Board of Directors (BOD) ti Benguet Electric Cooperative (BENECO) nga awan ti mapaspasamak nga ‘overstaying’ kadagiti miembro ti BOD ti kooperatiba.
Iti panakiuman ti Bombo Radyo Baguio, pinaglibakan ni Atty. Esteban Somngi ti maibagbaga a nagpason a termino dagitoy ken adda dagiti nagtugaw a BOD a saan met a nabotosan.
Sigun kenkuana, nagna iti eleksion dagiti amin a maipatpatugaw a miembro ti BOD.
Kinunana a gapu iti daytoy ket maamuanda no nadanonen ti tallo a tawen ti panagserbi ti maysa a miembro ti BOD a rason tapnu saanen a mairaman pay daytoy iti eleksyon iti panakapili dagiti agbalin a mimbro dagitoy.
Inlawlawagna met a saan a maliklikan a mailaylayon ti termino dagiti BOD gaputa awan ti maipatungpal nga eleksion.
Kabayatanna, impettengna nga smear campaign laeng dagiti maibatbato nga alegasyon ita kadagiti miembro ti BOD kas iti maatap a panangisalda ti maysa a miembro dagitoy iti lugan ti BENECO.
Innayonna a saan nga isyu ita dagiti miembro ti BOD gaputa nasken a maipangruna a marisot ti isyu ti panakapili ti General Manager ti kooperatiba.
Maipalagip a kagiddan ti bumarbara nga isyu iti General Manager a posisyon iti BENECO ket kukwestionaran dagiti maseknan nga umili ti kwalipikasyon dagiti BOD ti kooperatiba.
Maibasar iti website ti BENECO, lima a BOD ti nagpaso ti terminoda idi 2019 bayat nga innem a BOD ti nagpaso ti terminoda idi 2017.
