--Ads--
BAGUIO CITY – Nailukat ti maikadua a provincial quarantine facility ti Benguet kasaruno ti panagngato ti kaso ti COVID-19 iti probinsia.
Sigun kenni Governor Melchor Diclas, masarakan ti pasilidad sadiay Wangal, La Trinidad ken daytoy ti mangakomodar kadagiti baro a pasyente ti COVID-19 gaputa napunnon ti Benguet General Hospital (BeGH).
Kinunana a siyam kadagiti sangapulo ket uppat a baro a kaso iti Huwebes ket naiturong wenno naakomodaren iti Provincial Quarantine Facility II bayat a dagiti dadduma ket iti BeGH.
Maipalagip a nailukat ti Benguet Training Center kas triage center ken temporaryo a quarantine facility para kadagiti locally stranded individuals (LSIs) ken returning OFWs.