Nagun-od ti Baguio City ti maikapito a puesto iti 2022-2023 National Achievement Test (NAT) iti intero a pagilian, bayat a nangipakita ti panagrang-ay dagiti estudiante iti Grade 6 iti kaudian nga assessments.
Sigun kenni Baguio City Schools Division Superintendent Soraya Facullo, ngimmato ti iskor dagiti Grade 6 iti 12% manipod idi 2023 agingga iti 2024, nangatngato manipod iti 44.97% agingga 57.31%.
Daytoy ket mangipasimudaag nga adu nga estudiante ti kayana a makaaramid iti “tasks” nga agmaymaysa.
Ngimmato metlaeng ti iskor dagiti Grade 12 iti 3.25% iti isu metlaeng a panawen, nu sadinno nakadanon pay iti 50.09%, a mangipakpakita nga umas-asideg dagiti estudiante a mangragpat kadagiti targetda iti grade-level.
Kinuna ni Facullo a dagiti panagrang-ay ket gapu iti panangipaayda kadagiti learning materials, pannakitinnulongda iti komunidad, ken pannakaaramat ti datos a mangipakaammo kadagiti estratehia.
Nupay kasta, kinunana a kasapulan latta a mapasayaat ti critical thinking dagiti estudiante ken ti panangaramat kadagiti ebidensia iti panangaramid kadagiti argumento.
Iti baet a nasayaat ti resulta ti NAT iti rehion Cordillera, kasapulan ti ad-adu pay a suporta para kadagiti senior high school learners, nangruna iti panagproseso ken panangtarawidwid iti impormasion.
Tapno marisut ti “learning gaps,” nangruna iti “reading,” math ken science, ipatpatungpal dagiti pagadalan ti Baguio ti programa nga “Aral”, maysa nga inisiatiba tapno matulongan dagiti estudiante a makasabay.
Kidkiddawen pay ni Facullo iti komunidad a makipartisipar babaen ti panagboluntario kas tutor para kadagiti estudiante ti K-10 kadagiti kangrunaan a subjects.
