BAGUIO CITY – Malagip ita nga aldaw ti maikatlo a tawen nga anibersaryo ti ipupusay dagiti 44 a kameng ti PNP-Special Action Force a napasag iti Mamasapano Massacre sadiay Tukanalipao, Mamasapano, Maguindanao idi Enero 25, 2015.
Kagiddan iti daytoy, mangisayangkat ti maysa a seremonya sadiay Camp Bagong Diwa Bicutan, Taguig City nga idaulwan ti PNP-SAF.
Sigun kenni PSI Jonalyn Malanat, panakangiwat ti PNP-SAF, naawagan ti aktibidad dagitay a Day of National Remembrance for the SAF 44.
Kinunana a ditoy manen a malagip ti kinabanuar ken ti sakripisyo dagiti kakadwa dagitoy idi tawen 2015.
Paset ti seremonya dagitoy ti panangidatonda iti sabong babaen kadagiti kapamilya dagiti sumagmamano a SAF 44.
Kabayatanna kinanselar met ti SAF 2nd Battalion nga idadauloan ni PSupt. Mario Mayam-es ti naituding nga aktibidad dagitoy sadiay Lepanto, Mankayan gapu iti kinakurang ti oras iti panagsagana dagitoy.
Nupay kasta, mangisayangkat dagitoy iti simple a seremonya iti Brigade Headquarters dagitoy.
Maipalagip nga idi napalabas a tawen ket naipatakder ti monumento dagiti Gallant 44 sadiay Lepanto National Highschool a nagtaudan dagiti a pimmusay a tallo a miyembro ti SAF a da SPO1 Noel Golocan, PO2 Noble Kiangan ken PO1 Angel Kodiamat.
Immuna metten nga indeklara ni Presidente Rodrigo Duterte ti Proclamation No. 164 wenno National Day of Remembrance para iti panakalagip dagiti SAF 44.
Maipalagip nga idi Enero 25, 2015 ket naisayangkat ti Oplan Exodus a maysa nga operasyon tapnu makemmeg ti dua nga international terrorist a da Basit Usman kenni Zulkifli bin Hir alyas Marwan a maysa a bomb maker manipud Malaysia.
Mismo a ni PSI Tabdi ti nangputed iti maysa kadagiti ramay ni Marwan.
Manipud iti 44 a bilang dagiti napasag a police commandos ket 14 kadagitoy ti nagtaud iti rehiyon Cordillera pakairamanda:
PCI Gednat Garambas Tabdi ti La Trinidad, Benguet
PCI Cyrus Aniban ti Balbalan, Kalinga
SPO1 Robert Domollog Allaga ti Banaue, Ifugao
SPO1 Noel Onangey Golocan ti Mankayan, Benguet ken Sagada, MP
PO3 Peterson Indongsan Carap ti Kabayan, Benguet
PO3 Walner Faustino Danao ti Irisan, Baguio City
PO3 Franklin Cadap Danao ti Tinoc, Ifugao
PO3 Jerry Dailay Kayob ti La Trinidad, Benguet
PO3 Noble Sungay Kiangan ti Mankayan, Benguet
PO3 Nicky de Castro Nacino Jr. ti Baguio City
PO3 Joel Dulnuan ti Kiangan, Ifugao
PO2 Russel Bawaan Bilog ti Tabuk City, Kalinga ken Sagada, MP
PO2 Gringo Charag Cayang-o ti Sadanga, MP
PO2 Angel Chocowen Kodiamat ti Bontoc, MP ken Mankayan, Benguet
