Ginandat nga ipila dagiti grupo ti sigud nga opisyales ti gobyerno ti maikatlo nga impeachment complaint kontra kenni President Ferdinand Marcos Jr. idi malem kalman.
Pakairamanan daytoy ni sigud nga Environment and Natural Resources secretary Mike Defensor, sigud nga Armed Forces chief-of-staff Hermogenes Esperon,ken sigud nga Ilocos Sur Governor Chavit Singson.
Nupay kasta, saan nga inawat ti Office of the Secretary General ti nasao a reklamo gapu ta adda iti ballasiw-taaw ni House Secretary General Cheloy Garafil tapno awaten ti award manipod iti Ministry of Foreign Affairs iti Taiwan.
Gapu iti dayta, kinuna ni Mike Defensor a ti saan a panangawat ti Office of the Secretary General iti House of Representatives iti impilada nga impeachment complaint ket nalawag a panaglabsing iti Konstitusyon.
Maipalagip nga idi metlaeng kalman ket pinadas ti Bagong Alyansang Makabayan (Bayan) ken allied groups nga ipilaan iti impeachment complaint ti presidente ngem saan metlaeng daytoy a naawat, ngem nangibati latta dagitoy ti kopya.
Daytoy ti maikadua koma nga impeachment complaint kontra iti presidente kalpasan nga impila ni Andre de Jesus ti umuna kadagiti nasao a reklamo idi January 19 babaen iti panangiyendorso ni House Deputy Minority Leader and Pusong Pinoy Party-list Rep. Jett Nisay.
