Isardeng ti “circus” ket sanguen dagiti biktima ti “drug war”.
Daytoy ti mensahe dagiti mammanday-linteg a da Raoul Manuel, Arlene Brosas ken France Castro kenni sigud a President Rodrigo Duterte, gapu iti naipadamag a plano a panagbisitana idiay Batasang Pambansa idi Mierkoles.
Kinuna ti sigud a pannakangiwat ni Duterte a ni Salvador Panelo, agturong ni sigud a President Duterte iti Kongreso tapno komprontaren ti Quad Committee (QuadComm) gapu iti pannakaitantan ti panagdinggeg maipapan iti drug war ti administrasion ni sigud a President Duterte, uray pay naipakaammo iti kampo ni Duterte ti pannakaitantan idi Lunes, Nobiembre 11.
Impeksa ni House Assistant Minority Leader ken Gabriela partylist congresswoman Brosa nga awan ti karbengan ni Duterte a mangsinga iti napanggep a “Mass for healing” a pakipasetan dagiti biktima ti drug war, a naituding iti alas 9 ti bigat iti Kamara.
Sigun kenni Brosas, “agaw-eksena” ti sigud a presidente iti naituding a panagparang dagiti biktima ti “drug war” iti kanito a makipaset daytoy iti baet a naipadamag kenkuana nga awan ti naituding a panagdinggeg ita nga aldaw.
Immanamong met ni House Deputy Minority Leader ken ACT Teachers representative Castro nu sadinno, kinunana a kanayon a dakkel ti showmanship ni Duterte.
