BAGUIO CITY – Impaulog ti lokal a gobyerno ti Baguio ti Temporary Transportation Plan para ditoy siudad a nangrugi ita nga aldaw, April 1 ken agleppas inton tapos, April 30.
Nailanad iti paka-ammo nga epektibo latta ti Number Coding Scheme ti Baguio ken maiyaplikar daytoy kadagiti amin a pribado a lugan ken motorsiklo nga agbibiahe iti uneg ti siudad malaksid laeng kadagiti nabigbig a mailaksid iti nasao nga scheme.
Nawaswas met ti number coding scheme para kadagiti pribado a lugan manipud ita nga aldaw, April 1 agingga inton Dominggo, April 4.
Temporaryo a mailaksid wenno saan a karaman dagiti amin a parapasahero a jeep iti implementasyon ti number coding scheme.
Maipalubbos metlaeng ti panagbiahe dagiti amin a parapasahero a jeep ditoy Baguio malaksid laeng iti ruta ti Trancoville ken Aurora Hill gapu 100 laeng nga yunit ti naipalubos nga agbiahe kadagitoy.
Posible met a manayonan ti 366 nga Special Permits nga inted ti Baguio Police kadagiti parapasahero a jeep manipud iti La Trinidad, Itogon, Sabla, Tuba ken Tublay, depende iti panagadal dagiti tunggal PUJ Association Officials dagiti nasao a munisipyo.
