BAGUIO CITY – Epektibo ita nga aldaw (Hunyo 1) agingga inton Hunyo 30 ti Temporary Transportation Scheme para iti siudad ti Baguio nga inpaulog ti Baguio Traffic and Transport Technical Working Group kagiddan ti pannakaipasidong ti siudad iti modified general community quarantine (MGCQ).
Maibasar iti eskima, nasken a suruten dagiti pribado a lugan nga agturong ditoy Baguio City ti temporaryo a number coding scheme mangrugi ti oras ti 7:00 am agingga 7:00 pm.
Nupay kasta, saan a karaman dagiti Public Utility Jitneys (PUJs) iti temporaryo a number coding kabayatan ti MGCQ ditoy siudad ti Baguio.
Mapalubusan nga agbiahe dagiti PUJs iti oras ti 5:00 ti agsapa agingga 9:00 ti rabii.
Maituloy ti operasyon dagiti 516 a PUJs a naipaayan ti special permit manipod iti LTFRB ken kanayunan dagiti 258 a yunit nga inrekomendar ken inyendorso ti LTFRB.
Nasken metlaeng a suruten dagiti Cargo ken Delivery Trucks ti temporaryo a number coding scheme dagitoy.
Kabayatanna, para met kadagiti taxi, mapalubusan ti operasyon dagitoy iti oras ti 6:00 ti agsapa agingga iti 6:00 ti agsapa iti kasruno nga aldaw.
Maal-allukoy met ti panangipatungpalda ti No Face Mask, No Ride policy tapno maliklikan ti panagwaras ti corona virus.
