BAGUIO CITY – Impaayan ni Baguio City Mayor Benjamin Magalong iti makatawen a pawayway ti General Services Office (GSO) ken dadduma pay a maseknan nga ahensia tapno mapagbalin kas eco-park ti Irisan Dumpsite.
Sigun kenkuana, umdasen ti makatawen tapno iproseso ti GSO dagiti marunrunot a basura iti Irisan Dumpsite.
Kinunana a masapol a magiling ti agarup 30,000 metric tons a basura sakbay a mapagbalin nga eco-park ti nasao a pagbasuraan.
Impetteng ti mayor a marugian ita a bulan a matutukan ti nasao a pakaseknan.
Puntirya ti kabarbaro nga ama ti siudad a malpas ti proyekto sakbay nga agleppas ti umuna a kuarter ti 2021.
Immunan a nakipatang ni Mayor Magalong iti Department of Science and Technology tapno adda ti mabukel a technical working group a mangikkat iti kinabangsit ti basura sadiay Irisan Dumpsite tapno agbalin daytoy nga eco-park.
