BAGUIO CITY–Agtaltalinaed iti pagagasan ti maysa a maladaga kalpasan nga imbelleng daytoy ti inana iti basuraan iti maysa nga inn iti sentro ti siudad ti Baguio idi kalman.
Maibasar iti imbestigasyon, nag-check in ti ina iti maysa nga inn iti abay ti Malcolm Square iti alas dies ti rabii idi Dominggo, kaduana ti maysa a saan pay a nabigbig a lalaki.
Nupay kasta, iti alas dos agingga alas tres ti parbangon ti Lunes, nakangngeg ti maysa a kustomer ti inn iti panagsangit ti maysa a maladaga manipud iti comfort room iti bangir daytoy a silid.
Kiniddawna ti tulong ti room attendant ken idi sinukimatda ti nasao a comfort room ket sadiay a nakitada ti kaipaspasngay a maladaga a naibelleng iti basuraan.
Dagus dagitoy a nagpatulong iti pulis ken iti emergency medical services a nangitaray iti maladaga iti pagagasan.
Naispal ti nasao a maladaga nga ita ket agtaltalinaed iti intensive care unit.
Iti met panagsawar dagiti pulis, nakitada ti maysa a babae sadiay Malcolm Square ken daytoy ket agpadpadara ken agkakapsot.
Intarayda daytoy iti pagagasan ken iti panangimbestigarda ket inaklon ti nasao a babae a daytoy ti ina ti naibelleng a maladaga.
Naipaima met ti kaso iti Women and Children’s Protection Desk ti pulisya ken iti City Social Welfare And Development Office para iti umno nga aksion.
