Pimmusay ti maysa a maladaga idiay Quezon province kalpasan a naiyanod daytoy ken nadadael ti balayda iti panawen ti bagyo nga Aghon itay laeng kanikadua.
Nasarakanen ti bangkay ti maladaga iti kinabigatanna.
Kabayatanna, ita laeng nga aldaw, agtultuloy ti panagmonitor ti Quezon Provincial Disaster Risk Reduction and Management Office (PDRRMO) ken Provincial Government iti nagbalin nga epekto ti bagyo nga Aghon.
Ti nasurok maysa a ribo nga indibidual a naiyakar iti nasao a probinsia ket nanayunan pay.
Saan paylaeng a nalawag ti gatad ti nadadael iti agrikultura ken imprastruktura ti nasao a probinsia.
Iti maysa nga ili iti nasao a probinsia, nangiwaras ti lokal a gobierno iti food pack kadagiti umili sadiay a temporaryo nga agnanaed kadagiti evacuation centers.
Bimmaba metten ti lebel ti danum kadagiti nalayos a lugar idi laeng kalman.
