![](https://img.bomboradyo.com/baguio/2019/12/baby.jpg)
BAGUIO CITY – Pimmusay ti maysa a maladaga kalpasan a nairaman kadagiti dinungpar ti motorsiko sadiay Coplo, Nangalisan, Tuba, Benguet itay kanikadua.
Agtawen iti maysa ket innem a bulan ti maladaga bayat a dagiti dadduma pay a biktima ket nabigbig a da Christflor Benito, 22-anyos, ina ti maladaga ken Philip Kias, 37-anyos, agpada a residente ti nasao a lugar.
Nabigbig met ti rider ti motorsiklo a Nicole Pasigon, 20-anyos, residente ti Km. 5, Asin Road, Baguio City ken ti back rider daytoy a ni Bernard Sia-o, 18-anyos.
Maibasar iti imbestigasyon ti pulisya, nakatugaw dagiti biktima iti igid ti kalsada sadiay San Pascual, Tuba idi killaat a dinungpar dagitoy ti motorsiklo.
Naduktalan nga immagaw iti linya ti motorsiklo a nagresulta iti panangdungparna kadagiti biktima.
Dagos a nagresponde dagiti opisyal ti Barangay Nangalisan ken BFP-Tuba ken naiturong dagiti biktima iti Baguio General Hospital ang Medical Center ngem sadiay a pimmusay ti maladaga.
Kabayatana, naiturong met da Pasigon ken Sia-o sadiay Notre Dame Hospital gapu iti nakaro a dunor a nasagrap dagitoy.
Agtultuloy ti imbestigasiyon dagiti otoridad iti nasao nga insidente.