Naaprubaran iti first reading ti Baguio City Council ti isaksakad nga ordinansa ni Councilor Edison Bilog a mang-ob-obliga kadagiti amin a barangay iti siudad nga ag-install, ag-operate, ken agmintinar iti closed-circuit television (CCTV) systems kas paset ti seguridad ken kinatalna iti komunidad.
Nakalanad iti singasing nga ordinansa a kasapulan nga agikabil tunggal barangay iti saan a bumaba iti sangapulo a kanayonan a CCTV units tunggal tawen.
Maipangruna a makabilan iti CCTV dagiti kangrunaan a kalsada, interseksyon, barangay hall, dagiti entry ken exit points.
Nakalanad pay iti ordinansa a nasken a dagiti CCTV system ket addaan iti high-definition recording, 24/7 operation nga addaan iti night vision capability, saan a bumaba iti 30 nga aldaw a video storage, masapul nga addaan iti backup power supply, ken tamper-proof a data storage.
Nasken a siguradoen dagiti barangay ti tuloy-tuloy a monitoring ken dagus a panagresponde iti kanito a maaddaan iti aberya ti CCTV.
Malimitaran ti usar ti CCTV footage para laeng iti seguridad ti publiko, panangliklik iti krimen ken para iti law enforcement nu sadino dagiti laeng awtorisado nga indibidwal ti maka-access kadagiti recordings kas panagtulnog iti Data Privacy Act of 2012.
Mamulta dagiti opisyal ti barangay a saan nga agtungpal iti ordinansa manipud iti P2,000 agingga P5,000
depende iti bilang ti panaglabsing, malaksid pay iti posible a pannakaipila ti administrative, civil o criminal case.
Mamulta metlaeng dagiti mapaneknekan nga indibidwal a nangdadael, nakibiang wenno dagiti iligal a nang-usar iti CCTV system wenno footage iti P5,000 ken mabalin a mabalud iti saan a bumaba iti maysa a bulan.
Obligado met dagiti barangay nga agisumiter iti tinnawen a report iti lokal a gobyerno maipapan iti monitoring dagitoy iti bilang ti CCTV units, kondisyon dagitoy ken dagiti insidente a natulungan ti CCTV iti imbestigasyon wenno emergency response.
Iti kanito nga agbalin daytoy a naan-annay a linteg ket posible a maksayan ti buteng dagiti residente nangruna dagiti agaw-awid wenno magmagna iti rabii.
