BAGUIO CITY- Epektibon ti Executive Order No. 159-2021 a mangibilbilin iti mandatory a panakaipasidong iti testing dagiti empleyado ti gobierno ken pribado a kompanya ditoy siudad a saan a nabakunaan kontra iti COVID19.
Iti panakiyuman ti Bombo Radyo Baguio, dinakamat ni City administrator Engr. Bonifacio De la Pena a manipud naiwaragawag ken napirmaan dagiti probision ti linteg ket dagos a nagepekto daytoyen.
Nailanad iti linteg a nasken nga agpaisidong iti COVID-19 testing dagiti saan a bakunado nga empleyado iti pribado ken parapubliko a sektor iti tunggal dua a lawas no sadino ibaklayda ti gastos para iti daytoy.
Nailanad pay iti deriktiba a maikalikagum ti RT-PCR wenno antigen test agingga a mabakakunaan iti umuna a dose ti maysa nga empleyado.
Nupay kasta, kasapulan nga agpaisidong iti mandatory regular testing ti empleyado a napaay a makakompleto iti bakuna dagitoy.
Para kadagiti empleyado a saan a napalubosan nga agpabakuna gapu iti kondisionda iti salun-at, masapol a mangiparangda iti medical certificate manipud iti City Health Services Office a mangilaklaksid kadakuada iti bimonthly test requirement ngem nasken latta nga agpaisidongda iti nasao a test iti quarterly basis.
Sigun kenni De la Pena, nainget a mamonitor dagiti establishimiento no nabakunaan dagiti empleyado dagitoy babaen iti panangimuntarda iti pakaammo dagitoy nga amin nga empleyadoda ket nabakunaan kontra iti COVID19.
Karaman ditoy dagiti construction workers tapno maamwan ti publiko a nabakunan dagiti trabahador kontra iti virus.
impanamnama pay ti lokal a gobierno a nainget latta a maiwanawan dagiti bakunado nga empleyado tapno maipanamnama ti kinatalged dagitoy kontra iti nagduduma a variant ti COVID19.//RMBLS
