Abra- Manamnama nga ad-adu pay ti mangipila nga “aspirants” inton bigat, ti maudi nga aldaw ti panangipila ti COC a kayatna nga agngayang para iti 2025 national ken lokal eleksion.
Maibasar iti listaan ti Comission on Elections-Abra, maysa ti nangipila ti kandidaturana iti kina-kongresista iti sidong ti Lakas Christian Muslim Democrat a ni Joseph Sto Niño B. Bernos; maysa iti kina-gobernador iti sidong ti Partido Federal ng Pilipinas a ni Eustaquio Bersamin; maysa iti kinabise-gobernador iti sidong ti Partido Federal ng Pilipinas a ni Ana Marie A Bersamin; bayat a walo iti kina-Sanguniang Panlalawigan nu sadinno, lima iti District 1 bayat a tallo iti District 2.
Para iti municipal mayor, nangipila iti kandidaturana ti kina-mayor ni sigud a Bucay Mayor ken sigud a Sanguniang Panlalawigan Member Jun B. Baroña iti munisipyu ti Lucab, Abra; kina-mayor ti Dolores, Abra ni Albert Z. Guzman; Elixer Pacas para iti San Isidro,Abra; incumbent Sanguniang Panlalawigan Member Amador Diaz para iti kina-mayor ti San Quintin, Abra ; kina-mayor metlaeng ni Artemio ‘Billy’ Donato jr. para iti Pidigan, Abra; incumbent Mayor Tyron Beroña para iti panagsublina ti kina-mayor ti Pilar, Abra; incumbent Mayor Conde Turqueza para iti Dolores, Abra; incumbent Mayor Fernando Jhun Semanero Jr. para iti Sal-lapadan, Abra; Marilyn Seafer Pacsa para iti kina-mayor ti San Isidro ,Abra; ken incumbent Lagayan Mayor Edmarc Crisologo para iti panagsublina ti kina-mayor ti Lagayan, Abra.
Para met iti municipal vice mayor, maysa paylaeng ti nangipila ti kinamayor iti Bucay, ken awan paylaeng iti dadduma a munisipyu ti Abra. Iti interview ti Bombo Radyo kenni Atty. Nicasio Jacob, Provincial Election Supervisor-Abra, kinunana a natalna ken naanayas ti panangipila ti kandidatura dagiti agngayangay babaen ti tulong dagiti pannakabagi ti linteg.
Kabayatanna, saan paylaeng a nalawag nu ngimmato wenno bimmaba ti bilang dagiti “registered voters” iti probinsia ti Abra gaputa saan paylaeng a nalpas ti Election Registration Board (ERB) hearing, a manamnama a maipatungpal inton Oktubre katorse.
Ti Election Registration Board (ERB) hearing ket wagas ti Commission on Elections tapno mai-update ti listaan iti registered voters, ken tapno maikkat dagiti pimmusay nga indibidual kas maibasar iti Local Civil Registrar, dagiti “deactivated” wenno dua a “regular elections” a saan a nakabotos ken dadduma pay a rason.
