Nangipatungpal ti Bureau of Immigration (BI) iti nationwide manhunt operation kadagiti dua a pugante a South Korean a nakalibas manipod iti pagbaludan idiay Muntinlupa.
Dagiti dua a pugante ket pakairamanan ti agtawen iti 32 a ni Lee Jingyu ken ti agtawen iti 44 a ni Yang Heejun.
Ni Lee ket sumangsango iti kaso nga adda pakainaiganna iti drug smuggling idiay South Korea ken naarestar daytoy idiay Pasay City idi November 17 gapu iti panang-organisarna iti drug trafficking iti Pilipinas idi 2024, bayat a sumangsango met ni Yang kadagiti nagduduma a kaso kas iti theft idiay South Korea ken addaanen daytoy iti Interpol Red Notice.
Dagiti dua ket temporaryo a naibalud iti Warden’s Facility iti Bureau of Immigration (BI) idiay Muntinlupa bayat a matingtingiting ti deportation para kadagitoy.
Sigun iti nasao nga opisina, nadiskubre ti kameng iti custodial force team kabayatan ti routine inspection dagitoy ti maysa a tali a naigalot iti likudan a paset iti ward gate ti nasao a pasilidad.
Nakumpirmar met a nakalibas da Yang ken Lee kalpasan a naipatungpal ti headcount ken inspeksiyon kadagiti amin a ward.
Kabayatanna, kinuna met ni Immigration Commissioner Joel Viado a nagkiddawdan iti tulong manipod iti Bureau of Corrections (BuCor) ken National Bureau of Investigation (NBI) para iti panakasarak dagiti dua a pugante.
