BAGUIO CITY – Pimmusay ti maysa a mannalon kalpasan a maatap a binugbog daytoy ti bukodna a kabsat sadiay Calabigan, Luna, Apayao idi kanikadua.
Nabigbig ti pimmusay a ni Marcelino Raymundo, baro bayat a nabigbig ti suspek a kabsatna a ni Gavino Raymundo, 51-anyos, naasawaan, mannalon ken agpada dagity a residente ti Luna, Apayao.
Maibasar iti report, paawid ti suspek idi killaat daytoy a kinumprontar ti biktima a nangitunda iti panaglaban dagitoy.
Nabaelan ti suspek a nakalibas ken nagawid ngem sinurot latta daytoy ti biktima ken sadiay a kinarit ti biktima ti suspek.
Nangitunda daytoy tapnu agala ti suspek iti kayo nga impangpang-urna iti ulo ti biktima iti sumagmamano a daras a nagresulta iti panakapukaw ti puot ti biktima.
Kalpasanna, intupak ti suspek ti dakkel a bato iti ulo ti biktima a nagresulta iti dagus nga ipupusay daytoy.
Narekober dagiti pulis ti bangkay ti biktima nga addaan nakaro a dunor iti ulo manipud iti igid ti waig iti nasao a lugar.
Boluntaryo met a simmuko iti pulisya ti suspek ken insukona pay ti inaramatna a nangpangpang-or iti biktima.
