BAGUIO CITY–Pimmusay ti maysa a mannalon kalpasan a pinaltogan daytoy ti nakemmeg a suspek sadiay Tawang, Guilayon, Tabuk City, Kalinga idi kanikadua.
Nabigbig ti biktima a ni Elmer Bayog Tumbali, 52-anyos, mannalon ken residente ti Cabayan, Guilayon, Tabuk City bayat a nabigbig ti suspek a ni Glen Ganagan Macocay alyas Mullat, 22-anyos, mannalon ken residente ti Tudoy, Guilayon, Tabuk City.
Maibasar iti report ti Tabuk City PNP, nagturong ti biktima ken dagiti sumagmamano a barangay officials iti Purok Center ti Tawang, Guilayon idi Dominggo para iti panakarisut ti kaso nga inaramid ti maysa a barangay kagawad ken maysa a tanod a panaglabsing iti Barangay Ordinance.
Nupay kasta, awan ti nagparparang kadagiti respondents ken idi pumanawen kuma ti biktima ken dagiti kakaduana a barangay officials, killaat nga inasitgan ti nabartek a suspek ti biktima ken pinagsasawanna daytoy sakbayna a pinaltogan ti biktima iti namindua a daras.
Dagus a naglibas ti suspek bayat a naitaray ti biktima iti pagagasan ngem pimmusay daytoy bayat ti panakatamingna.
Nakemmeg met ti suspek babaen iti hot pursuit operation ken naduktalana a nabayag a personal a gura ti rason ti suspek iti panangpaltogna iti biktima.