--Ads--
BAGUIO CITY – Pimmusay ti maysa a mannursuro kalpasan nga aksidente a dinungpar daytoy ti maysa a van sadiay Abanao Road Extension, Baguio City idi malem kalman.
Nabigbig daytoy a ni Mary Luis Siw-ang, 62-anyos, tubo ti Sabangan, Mt. Province ken residente iti siudad ti Baguio.
Nabigbig met ti driver ti van a ni Ponce Sab-it Batnag, 38-anyos ken residente ti Pinsao, Pilot Project, Baguio City.
Maibasar iti imbestigasion ti Traffic Enforcement Unit ti Baguio City PNP, nagtaud ti nasao a van sadiay Kisad Road paturong iti direksion ti Abanao Road Extension idi nadungparna ti agbalballasiw a baket.
Nagsagrap ti biktima iti dunor, partikular iti barukongna ken dagus a naitaray iti pagagasan ngem naideklara a dead on arrival.
