Imbilin ti Department of Education (DepEd) kadagiti pagadalan a saanda a piliten dagiti educators a mangisuro iti nasurok innem nga oras, kas maibasar iti sidong ti Magna Carta for Public School Teachers.
Sigun kenni Education Secretary Sonny Angara, mabalin nga ipaay dagiti mannursuro ti kanayonan a teaching loads ngem rumbeng a mabayadan.
Innayon ni Angara nga “actual classroom teaching rendered” laeng iti tunggal subject ken class advising duties ti maibilang a teaching load ken rumbeng a maibilang daytoy kas paset iti innem nga oras a teaching load dagiti mannursuro iti inaldaw.
Kabayatanna, kinuna pay ti nasao nga opisial nga amin a mannursuro a nangipaay iti innem nga oras nga actual classroom teaching ket maibilang a napennek iti inaldaw nga oras ti panagtrabaho ken saan a maipaayan iti salary deductions.
