BAGUIO CITY – Maiyaw-awis ti panakipaset ti publiko iti programa nga angayen ti lokal a gobierno iti panagsarabo ti baro a tawen ditoy siudad ti Baguio.
Iti interview ti Bombo Radyo Baguio, dinakamat ni City Adminitrator Bonifacio De la Pena nga adda ti maangay a programa inton Disyembre 31 sadiay Melvin Jones Grandstang a mangrugi iti alas-10 ti rabii.
Kinunana a mangipatungpal iti konsiyerto dagiti agtutubo ken dadduma pay a banda iti siudad ti Baguio agingga a dumanon ti countdown ti baro a tawen ken ditoy a mabuya ti fireworks display.
Sigun kenkuana, awan pay ti mapasamak a drone display ken drone formation ita a tawen gapu iti nagduduma a rason.
Impanamnamana met ti lokal a gobierno ti panakasurot ti minimum public health standards kabayatan ti bisperas ti baro a tawen.
