BAGUIO CITY- Nakanselar ti mapadpadaanan a laban da ONE strawweight world champion Joshua Pacio ken ti sigud a UFC fighter Jarred Brooks iti saan nga ammo a rason.
Iggem ti 26-anyos a ni Pacio ti 19 a pangabak ken tallo nga abak nu sadino idepensarna koma ti gold-plated strap kontra kenni Brooks iti main event ti ONE 158 inton Hunyo 3 sadiay Singapore ngem nakanselar.
Iggem met ti 29-anyos a ni Brooks ti 19 a pangabak ken tallo nga abak kalpasan nga inabakna ti number one contender a ni South African Fighter Bokang Masunyane iti ONE 156 idi Abril babaen iti first-round submission.
Sigun kenni Pacio, saanna nga ammo nu anya ti napasamak iti kalabanna ken nu anya ti rason iti panakakanselar ti laban dagitoy ngem para kenkuana ket nakasagana daytoy a lumaban.
Iti agdama ket awan paylaeng ti pammalawag ti ONE Championship seknan iti panakakanselar ti laban da Pacio ken Brooks.
Naudi a naimatangan ti laban ni Pacio idi inabakna ti Japanase MMA Fighter a ni Yosuke Saruta iti grudge match dagitoy idi Setyembre 2021 babaen iti first-round technical knockout.
