Nakemmeg ti Bureau of Immigration ti maysa a mapapati a human trafficker iti Clark International Airport (CIA) iti aldaw ti Paskua bayat a sumagmamano a Pilipino ket naallukoy a mangged kadagiti kaasping ti Philippine Offshore Gaming Operator a trabaho iti ballasiw-taaw.
Maibasar iti statement a naipaulog idi kalman, uppat a biktima ken ti suspek ti na-intercept bayat ti panangpadasda a sumrek iti Singapore-bound flight.
Immuna a kinuna dagiti biktima nga agbiaheda a kas turista, ngem inaklonda metlaeng kalpasan ti sumagmamano a minutos a kaduada nga agbiahe ti 38-anyos a babai nga escort ken narekrutda kas encoder nga addaan iti naikari a binulan a sueldo a P60,000.
Inladawan dagiti biktima a ti panggedanda a kompania ket kaasping ti POGO nga agop-operate idiay Cambodia.
Inaklon ti “escort” wenno timmulong kadakuada nga inasistaranna dagiti biktima a makastrek idiay Singapore, a maiyakarda idiay Cambodia apaman a makastrekda.
Kabayatanna, idi laeng Disiembre a diez, maysa a 28-años a lalaki ti nangaklon a daytoy ket narekrut online a mangged idiay Laos ti na-intercept iti Terminal 3 ti Ninoy Aquino International Airport .
